年尾埋單

（不知道，能否在小虎睡醒之前寫得完？）

當然，今年變化很大。

１）個肚越來越大越脹，結果生埋隻小虎出嚟添。養養吓養到佢而家七個月大。

２）因為（１）的關係，生活習慣改得翻天覆地。跑步？行山？都變成隅一而之了。書店很少機會逛，看電影更是十年一閆。

３）結果，明明產後一個月左右，因為堅持母乳育嬰而大幅修身，已經平復的腹部，近月又脹回來了。嗚嗚。

４）紀律性奇差，無一次減腰圍成功、跑步n年都從來沒有跟足過一次training programme的我，竟然可以堅持到餵小虎喝純「媽媽牌」六個月。由初生時個零鐘、兩個鐘餵一餐，到而家三、四個鐘甚至更久一餐。家裡持續零奶粉儲備，當然亦無餵過佢食奶粉，除了小虎因為黃疸住院期間，由醫護人員餵過幾餐之外。到六個月後開始加固體食物，我竟然都仲餵緊。初步計劃餵埋個冬天先算。成世人，3x歲，都未試過咁有恆心做一件事。

５）誠然，每日返工帶埋奶泵冰袋冰種，加埋筆記簿錄音筆卡片套，真係擔泥咁重，長期要揹背囊返工，辛苦不足為外人道。好掛住個小手袋。

６）因為這樣，袋的空間有限，連書都放不下了。書少看了許多。除了心愛的《鋼鍊》漫畫終於追到大結局，睇過《1q84》第三部同《flat world news》，我現在完全想不起今年看過甚麼新書。舊書也不是有很多可以翻看。化妝品也只能帶最基本的份量。算啦，反正我已經破過戒，試過素顏出門。雖然返工時會化妝這條線，我還是會緊守。嘿嘿。

７）當然不可能不談小虎。要詳細的話，說到明天都說不完。但簡單而言，小虎真係好生性。好好湊，雖然成一點幾兩幾先肯瞓，雖然平時唔會理阿媽，最燦爛的笑容，都留給外婆奶奶冰男爸爸同一眾生保人，有所求唔舒服肚仔餓發脾四......先至會記得我。但係佢朝早晨早瞓醒，見阿媽仲瞓緊，會識自已玩吓、叫吓，甚至又瞓番，等我瞓多陣先使理佢。淨係呢樣已經十個叻。

８）所以覺得有小虎，係我執到。

９）正如剛跟冰男慶祝第四周年結婚記念，我仍會維持當年婚宴好想說的致詞「跟冰男一齊係我執到，希望佢都覺我同我一齊係執到」。

１０）健康方面，產前和產後復元良好。託賴大病欠奉。懷孕七個月以前，跟產後個多月至上班前，運動量也不錯。然而復工後終日趕頭趕命，於工作期間擠出一點點時間泵奶。本來工作期間食飯時間已經很匆忙，那自然成為首個犧牲對象。覺得自已食飯越來越似豬，個胃touchwood仲未出事，屬於奇跡，亦有好耐未能跟同行做完一單嘢後坐底吹吹水的經歷。隨著小虎對「媽媽牌」的需求將漸漸減少，希望自已的飲食習慣會回到正軌。

１１）其實我不知道甚麼叫母性？有時覺得自已只係照顧照一隻高需求寵物，一隻老虎
而已。希望自已來年會做得更好。

１２）工作上？如果以小虎作為老闆這份工而言，打得還可以吧。至於另一份受薪的就......同樣地，希望來年自已可以做得更好。

１３）因為忙得頭昏轉向的關係，好久沒有在這裡，好好的寫了。實在很抱歉。我沒有忘記這樣。希望來年可以控制時間好一點，在這裡繼續寫寫寫。